Hvað vissi ég um
leiðsögn þegar námskeiðið hófst?
Eins og sjá má hér var það ekki margt, þrátt fyrir að ég hefði í nokkur ár haft umsjón með
kennaranemum.
Reyndar voru nokkur atriði sem ollu mér heilabrotum:
Sú regla virtist vera til að fimm ára
kennslureynslu væri krafist af þeim sem tækju að sér nema, en þeirri reglu
virtist ekki alls staðar vera framfylgt.
Hlutverk mitt sem leiðsagnarkennara virtist
afar illa skilgreint. Nemar þeir sem ég tók að mér könnuðust ekki við að þeir
ættu að ígrunda reynslu sína, en það hafði verið alfa og omega í mínu
vettvangsnámi fyrir fáeinum árum. Svo virtist sem ég ætti helst að lýsa
frammistöðu nemanna fyrir þeim og gefa álit mitt á því hvað hefði gengið vel
eða illa.
Svo virtist sem misræmi væri milli
námskeiða Menntavísindasviðs varðandi það hvað ætti að vera fólgið í
vettvangsnámi. Þetta var því eins og fótboltaleikur þar sem sífellt er verið að
færa markstangirnar.
Samvinna kennaranema virtist mjög
handahófskennd, sem aftur rímaði illa við mína reynslu af vettvangsnámi.
Stundum var ætlast til að nemar ynnu saman, en þá varð að hverfa frá
heimaskólakerfinu til að það væri hægt. Markmið með samstarfinu virtust mér í
lausu lofti og sama mátti segja um nemana.
Heimaskólakerfið, sem við fyrstu sýn virtist
frábær hugmynd, hafði greinilega ekki verið hugsað til enda. Þannig virtist það
stundum skapa vesen að til væru skólar þar sem fram færi samkennsla árganga og
samþætting námsgreina í samfelldum vinnulotum, því verkefni nemanna voru hönnuð
fyrir hefðbundna bekkjarkennslu.
Það má kannski segja að þótt ég hafi haft sterka tilfinningu
fyrir því að ég vissi fátt um hvað þyrfti til að búa til góða leiðsögn og
markvisst vettvangsnám, þá virtist ég ekki vera einn um þá fáfræði.
Hver er reynsla mín?
Ég datt inn kennslustarfið fyrir slysni og starfaði sem
leiðbeinandi í rúm tvö ár og vissi ekkert hvað ég var að gera. Að vísu á ég
ekki langt að sækja kennsluhæfileika en þeir koma samt ekki með móðurmjólkinni,
það er bara bull. Mér veitti því alls ekki af því að skella mér í
kennsluréttindanám og var svo heppinn að stunda það við Félagsvísindasvið
Háskóla Íslands. Þar var námið markvisst og skilvirkt og mikil áhersla lögð á
ígrundun og metanám. Að námi loknu hóf ég störf við framsækinn grunnskóla í
mótun og átti mikinn þátt í alls konar skólaþróunarverkefnum þar. Skólinn var
fámennur þegar ég hóf þar störf og fljótlega var að mér sótt að taka að mér
kennaranema. Það var nýtt fyrir mér en sama mátti svo sem segja um flest sem ég
tók mér fyrir hendur í þessum skóla. Ég reyndi að byggja á reynslu minni af
eigin vettvangsnámi en komst að því að það hentaði illa. Bæði voru kröfur frá
Menntavísindasviði aðrar en þær sem gerðar höfðu verið til míns
leiðsagnarkennara, auk þess sem mikil orka fór í að aðstoða nemana að laga sig
að skólastarfinu hjá okkur, sem var ólíkt því sem þeir áttu að venjast – oft
svo ólíkt að þeir áttu í vandræðum með að uppfylla kröfur kennara sinna um
vettvangsnámið. Með árunum urðu vinnubrögð við skólann minn ögn markvissari við
móttöku kennaranema en betur má ef duga skal. Þess vegna ákvað ég að skrá mig í
námskeiðið um leiðsögn.
Hvað hef ég lært á
námskeiðinu?
Að skoða sjálfan mig sem kennara (Sjá nánar hér)
Að skoða sjálfan mig sem leiðsagnarkennara
(Sjá nánar hér)
Eitt og annað um hvað þarf til að gera
góðan leiðsagnarkennara (Sjá nánar hér)
Að vettvangsnám á Íslandi gæti verið
töluvert betra (Sjá nánar hér)
Að það er vísindalega sannað að maður geti
lært af mistökum (Sjá nánar hér)
Að sjálfsmynd kennara og hvernig hún mótast
er eitthvað sem ég vil skoða nánar (Sjá nánar hér og hér)
Að samvinna kennaranema skilar sér (Sjá nánar hér)
Að leiðsögn er sumstaðar ekki nægilega vel hugsuð (Sjá nánar hér)
Að hætta er á að nemar verði eftirlíkingar
af leiðsagnarkennaranum (Sjá nánar hér)
Að hætta er á að nemar verði framlengingar
af leiðsagnarkennaranum (Sjá nánar hér)
Að góður leiðsagnarkennari hefur áhrif á
viðhorf nema (Sjá nánar hér)
Að nemar finna að aukin færni leiðsagnarkennara
skilar sér í bættu námi (Sjá nánar hér)
Að færni í að veita tilfinningalegan stuðning
er lykilatriði (Sjá nánar hér)
Fagmennska mín –
skilgreining:
Þar sem ég er staddur í dag, við lok námskeiðsins, hefur mér
tekist að skilgreina eftirtaldar skyldur sem ég tel mig bundinn:
Gagnvart sjálfum mér – að ég sé stöðugt að læra og bæta mig.
Gagnvart nemanda – að honum líði vel og fái námsumhverfi við
hæfi.
Gagnvart foreldrum – að hagur barnsins sé í forgrunni.
Gagnvart teyminu – að óhætt sé að treysta mér fyrir mínum
verkefnum, að ég taki þátt í faglegri umræðu og leggi mitt af mörkum til
sameiginlegrar starfsþróunar teymisins.
Gagnvart stjórnendum – að ég geri það sem mér er sagt, að ég
leggi mig allan fram, að ég leggi mitt af mörkum til að skapa jákvæðan
starfsanda, að ég taki þátt í að móta stefnu skólans og viðhalda henni.
Gagnvart kennaranema – að ég stuðli að ígrundun og aktívu
námi, að ég sé sálfélagslegur stuðningur, að ég veiti ráðgjöf og endurgjöf á
uppbyggilegan hátt.
Gagnvart undirmönnum – að ég gæti sanngirni, dreifi björgum
og byrðum jafnt, að ég sýni trúnað og traust, að ég leggi mitt af mörkum til að
skipulag skólastarfsins sé í samræmi við sýn og stefnu skólans.
Nokkurn veginn á þessum stað er því starfskenning mín í dag.
Vonandi verður hún ekki lengi á sama stað.